Matthew 25

Lavapaase Poovo Ri Lasangaun Lovosono Maxat

1La ne Iesu ga tong bok lavapaase poovo. Ni ga lok keretna, “At laaleng at lovotpot tarak, Linintoo no vana at laxalibet ba lok ngan lasangaun lovosono maxat diga lok ka levenbabao atdi la digat pas kusu dina ekip tangarang mi laradi ga gagas kusu na epot. 2Lavalimo atdi diga baulang, la lavalimo digakleklen. 3Lovosono rangtangku diga lok ka levenbabao atdi, ketla di goxo lok ka tengkondan loklox antos ti mo levenbabao atdi. 4Ketla lavalimo lovosono leklen diga lok ka levengkondan loklox antos babao eburu mi levenbabao atdi. 5Nedi axap lovosono maxat diga ngangais abao rino, ketla mo laradi ga gagas ti epot kopmen goxo vot soso. Kuren la lemeren di ga unga la nedi axap diga unga nga.

6At laxanimin tubu limixin diga xup aoon min keretna, ‘Laradi i gagas ti epot nom ta i boro! Minat pas la mina ekip tangarang min!’

7La nedi lasangaun lovosono maxat diga aus kaxat la diga lox agagas levenbabao atdi. 8La lavalimo lovosono rangtangku diga lok ti mo lovosono leklen, ‘Mina raba nama mi tengkondan soksox antos babao, mila levenbabao atnama i xapkap tino.’

9Ketla lavalimo lovosono leklen diga vorang i ridi xeretna, ‘Kopmen. Agut lengkondan soksok antos babao xopmen na epovo do ridik axap. Minat pas uto at luvuttadi sesep la mina un kaka tengkot tinimi.’

10La lovosono rangtangku digat pas kusu ri un kaka tengkondan soksox antos babao; la ise diga onon, laradi ga gagas ti epot ga vot, la nedi lavalimo lovosono leklen diga vubeles eburu min ukeneng at leluxa at loklox aepot, la lumusaragu ga repe nga.

11Melemu lavalimo lovosono rangtangku diga vot la diga lok, ‘Leeme silok. Leeme silok. Una suang abeles nama.’

12Ketla ni ga vorang i ridi xeretna, ‘Nia a tong tuturun i. Axoklen nimi!”

13La ne Iesu ga lok tidi, “Mina gagas avukat, mila mi xoklen laaleng kopla loxonatat aleng at lovotpot tarak, Leeme Silok atnimi.”

Lavapaase Poovo Ri Levempilas

(Lu 19:11-27)

14La ne Iesu ga tong bok lavapaase poovo. Ni ga lok, “Ap mo laaleng Linintoo no vana at laxalibet naba lok keretna. Lara leeme silok gat pas uto vaxalom. Avot at lavatpas kaxat teren, neni ga xup kaka lavasaxaruki ren la ga lok taba di mi levempanga ren kusu dinak lok tatao i. 15Ti lasaxaruki avot teren neni ga raba i mi lavalimo talen; ti lara sepsev agepura neni ga raba i mi legepu talen; la ti lara sepsev avantun neni ga raba i mi legesa talen. Neni ga raba di min kuren, ga epovo mi lakleklen atdi. La ni ga vas kaxat basinge di. 16Mo lara ga lok ka lavalimo talen, soso mun neni gat pas la ga gugu mi mo leventalen la ga ruuna ka bok lavalimo talen. 17La mo bok lara ga lok ka legepu talen, neni bok ga gugu min la ga ruuna ka bok legepu talen. 18Ketla mo lara ga lok ka legesa talen, neni gat pas, ga xe lamamara la ga lox alipe mo legesa talen at leeme silok teren.

19Melemu at lentaba leven gaaling ga volo, leeme silok ap mo lavasaxaruki gamlong la ga xup kaka di kusu dina paase mumu lempilas digara lok ka vam i. 20Mo lasaxaruki avot ga lok ka vam lavalimo talen, ga vosiga mo leeme silok la ga lok tin, ‘Leeme silok. Nenu ga raba ia mi lavalimo talen la nia agara gu asu vam lara lavalimo talen bok.’

21La mo leeme silok ga lok tin, ‘I lox avukat aleng. Nenu lagale lasaxaruki rak. Nenu ga lok tatao avukat levempanga lixilik. Kuren la nia aba raba u mi laxampanga solo kusu una lok tatao i. Ude u ri leluxa rak. Ata lok momo eburu.’

22La mo lasaxaruki ga lok ka legepu talen, ga vosiga nom leeme silok la ga lok tin, ‘Leeme silok. Nenu ga raba ia mi legepu talen la nia agara gu asu vam legepu talen bok.’

23Leeme silok ga lok tin, ‘I lox avukat aleng. Nenu lagale lasaxaruki rak. Nenu ga lok tatao avukat levempanga lixilik. Kuren la nia aba raba u mi laxampanga solo kusu una lok tatao i. Ude u ri leluxa rak. Ata lok momo eburu.’

24La mo lasaxaruki ga lok ka legesa talen, ga vosiga nom leeme silok la ga lok tin, ‘Leeme silok. Nia agaklen i do nenu laradi lolos; uk lok kaka levempanga kopmen ataram, la u kaxat ka levempanga anan at leventaamang, nenu goxotlotlo i. 25Kuren la nia ga marat taram la agat pas la aga lok alipe na legesa talen taram to xopok at laxangka. Legesa talen taram na.’

26La leeme silok ga lok tin, ‘Nenu lasaxaruki kapmek la lavatpanga molo. Nenu ugaklen i do ak lok kaka levempanga kopmen atarak, la a kaxat ka levempanga anan, nenia goxotlotlo i. 27Tila ba nenu u goxo lok li latalen tarak to at loogu loklok li pilas kusu dina gugu min ti lox asilox i.’ 28La leeme silok ga lok ti lasaxaruki vetpes teren, ‘Una lok ka latalen teren la una raba i ri mo lasaxaruki ira ruuna ka vam lasangaun talen. 29A tong i rinimi do nedi di ruuna levempanga la di lok lugugu at ne Moroa min, aba raba bok di mi laxampanga solo; ket do tara na ruuna levempanga lixilik la kopmen na lok lugugu min, nia aba lok kaka amlong mo levempanga ren. 30La nia aba lu asu mi mo lasaxaruki molos uto at lamain bonot; limixin go dibak saxaanu la diba rungur ivivilis.”

Laradi Mevana Naba Ronga Linga At Limixin Axap

31La ne Iesu ga lok bok, “Do nenia, Laradi Mevana, ana vot mi lisisixam, eburu mi lubung angelo, nenia anabat kis at loxonin orong tarak mi lisisixam silok boro vana at laxalibet. 32La limixin axap at na lavatbung menemen diba tu ro melamgo rak. La nenia anaba epes di ri legepu binam tadi, kerekngan laradi loklok tatao sipsip ik lox epeseves laxasipsip basinge laxanme. 33Nenia anaba lok li laxasipsip uto saparap lakngak tino la laxanme uto saparap lakngak kia.

34La nenia, Loorong Silok, anaba lok ti limixin to saparap lakngak tino xeretna, ‘Ude nimi, limixin ne Tamak ira lox anarong pam nimi. Minat pas ude la mina ruuna ka leveloklox anarong at Linintoo, ne Moroa ga gagas pam min tinimi at lurutu kaxat at lavatbung menemen, 35mila agak toxo la migam taba luxa ia; agak minu la migam taba dan ia; aga nemen ngan laradi xadiong la migak lok maraose minia. 36Agak pakes ti levempanga singsiga la migam taba ia mi levempanga singsiga; agak meres la migak lok tatao avukar ia; agak lok at loogu xokoxo la migat posiga ia xusu minak lok tooro ia.’

37La melemu mo limixin mokmokso diba sue ia, ‘Leeme Silok. Lingisa nema maga ven u, ugak toxo la magam taba luxa u, la ugak minu la maga vaxain u? 38Lingisa nema maga ven u ngan laradi xadiong la magak lok maraose minu, kopla uga nemen goxopmen tempanga singsiga ram, la magam taba u mi levempanga singsiga? 39Lingisa nema maga ven u, ugak meres, kopla uga nemen at loogu xokoxo la magat posiga u xusu manak lok tooro u?’

40La nenia, Loorong Silok, anaba vorang i ridi xeretna, ‘A tong tuturun i rinimi. Do miga lox i na ri tara atdi limixin banbalo rak, i lok ngan mun miga lox i ria!’

41Melemu nenia anaba lok tidi limixin to saparap lakngak kia, ‘Uto nimi basinge ia, nemi limixin, lasaxaek naba suxuna nimi; uto nimi at laxao i anan tos amisik, ne Moroa ga gagas min ti ne Satan la lubung angelo ren! 42Agak toxo ketla mi goxo raba luxa ia; agak minu ketla mi goxo vaxain ia. 43Aga nemen ngan laradi xadiong, ketla mi goxo lok maraose minia, agak lok goxopmen tempanga singsiga rak, ketla mi goxo raba ia mi tempanga singsiga; agak meres la agak lok bok at loogu xokoxo ketla mi goxo vosiga ia xusu migita lok tooro ia.’

44La diba lok bok tia xeretna, ‘Leeme Silok. Lingisa maga ven u, uga roxo, la uga minu, la uga nemen ngan laradi xadiong la ugak lok goxopmen tempanga singsiga ram la uga meres la ugak lok at loogu xokoxo, la ma goxo lok tooro u?’

45La nenia anaba vorang i ridi xeretna, ‘A tong tuturun i rinimi. Do mi goxo lox i na ri tara atdi limixin banbalo, mi goxo lox i ria.”

46La ne Iesu ga lok bok, “Na limixin Moroa ba riki aonon di ri losongsongot i nemen amisik, ketla limixin mokmokso dinaba lok ka lorooro avolo.”